Bagia ada dikeneh
Aget lan lacur sing dadi alih apabuin ulah.Sugih teken lacur sing dadi uber kelidin.Ilehan eduman idup di guminé suka,duka lara,pati patuh sing dadi tunas,impasin. kewala i raga tetep patut mautsaha magae ane melah, tusing je nyerahang teken nasib.Yéning suba megae ane luung, pasti lakar nemu ane melah.“Eda ngadén awak bisa,”keto sesambat kramané Bali.kewala i raga patut ngangken bisa. yening seken saje bisa, i raga patut ngangkén bisa.jani liu anaké nungkalikang sesambaté ento,“Kadén awaké bisa,eda ngadén awaké tusing bisa.”ento kocap raos ngedénang bayu.
Hidup digumine jelek melah adung masanding.Aget lacure tusing je joh,jani lege buin kesep bise masalin sebet.Ane jani kenkenang apang nyidayang lege disebete.Patakon aluh nanging keweh pasautne.Ade satue anake wikan didarmawacanane.Aluh kone madingan keneh apang satate marasa nemu liang yadiastun je sedeng katiban sebet.Tutur buin satuayang.Ade jalan apang nyidayang sebet bise kedek,tuah apang bise iraga negakang keneh.Yen di luunge pejang kenehe lakar liunan melah ane lakar rasayang.Yening dijelek pejang kenehe sinah lakar jelek dogen merasa tepuk.kenken carane?.Yening disastrane takonin kene pesautne,melah melahang ngabe keneh ape ne kakenehang keto lakar tepuk.Tusing dadi mekeneh jelek teken anak len.ape buin teken awak pedidi.Mare uyut ajak kurenan jumah prajani ngae status di facebook nyelekang kurenan pang tawange ajak anake.Jelek pedidi de sanget edengange.Ene satuan nak lingsir pabedikin nyelekang timpal.Yen nulungin anak de inget ingetange.kewala yen anake nulungin irage de kanti engsapine.aluh saje kale keweh nyalanin.
Iraga idup dimarcapada sangkaning paican Kawi.Petprade mani puan urip matilar ninggalin raga ngungsi jagat niskala.Tusing nyidayang makelid,tusing dadi tunas tusing dadi tolak.Pajalane tuah mabekel karma ane lakar anggo titi pangancan ditu.Ento makarana saenu maurip apang setata eling teken Widhi.malaksana makeneh ane luung.Apang nyidayang nemu lega.apang nyidayang kedek disebete.Tusing nyandang sanget kenehang ane lakar teke ento tusing je karoan.De masi takut teken ane sube liwat,ane penting dinane jani ento sube pasti.Yen bes sanget ngenehang ane sube liwat takut teken nasib ane lakar teke iraga engsap ngerasaang hidup ane jani.pamuputne jeg sebet dogen lakar tepuk.
Bagia ade dikeneh tusing ulian liu ngelah pipis.Care jani liu anake ngalih demen disisi kaden ditu maan lega.Ade melali kekafe maseliahan ngengkebang sebet,kewala mebading liunan jeleke katepuk.ade masih ngalih lega mamotoh patuh sere panggang sere tunu. Setata marasa kuangan tekéning apa ané gelahang, ngranayang i raga sing suud-suud nepukin sengsara.lan jani melajah pang nyidayang marasa ngelah satonden ngelah.Ilidin sebet aji kenyem.buka sesenggake yen kulite selem palebihin makenyem apang sebenge sing masem.Yen sebenge masem gidate pecuk ngedesem sinah anake liu sing demen.yen suba keto ngancan sebet kenehe kerasa.hidupe ngancan baat.hidup tuah ngaliwatin awaine.jalanin dogen patuh care pajalan aine uli kangin ngati kauh.pajalan hidup keto masi.ngancan wai dinane maganti iraga ngancan lingsir buka aine ngeseng kauh.kewala yen nyidayang sakadi sunar suryane kancan ngeseng kauh ngancan luung sunaranne.Liu torise demen mabalih aine ane lakar kelem dilangite kauh ane adanine sunset.Ditu sulur idep sulur idup apang patuh.
------++++
de ananda
No comments:
Post a Comment