kumpulan puisi bali anyar .bli wayan

sebagai hiburan semata.
sebagian dari puisi ini sudah pernah diterbitkan di bali post bali orti
ikut melestarikan basa bali.

1. Ngaku tindih

Diastun sube sugih.
Ulian liu maan gajih.
Dini ditu maan ngidih.
Malahan bise lebih.
Nanging nu marase sedih
Sing ngarase pelih.
Sing takut sing jerih.
Kipak-kipek tolah-tolih.
Ngalih selah ngaku tindih.
Diastun gunung pasih.
Adep sepih-sepih.
Ané penting pipis lebih.
Pang liunan abe mulih.
Jeg elah aluh alih.

2.sing nyak kalah

Care jani madasar ban pongah.
Nyetir mobil kelas mewah.
Diapin tua ngenahné gagah.
Diastun jumah tusing ngelah.
Yening pesu ngenahné mewah.
Tusing nyak kalah.
Ngisinin jengah.
Jeléké saputin bungah.
Bungah ngenah melah.
Ané melah pang ngenah.
Jeléké engkebang ditengah.
Depang suba keto nah
Jelék melah pada ngelah
Gumi suba wayah
Tingkahé malagendah

olih
iwayan tojan

3. Narkoba

tingalin suryane kangin
masunar kuning sada makecing
tolih langité pelung tanpa ambu
macihna enu ade galah.
enu ade selah.
mapag lampah uripe ané melah
jalan hidupé nu lantang
de kanti telah makutang
megaé jani selegang
suud matimpal ngajak narkoba
narkoba ngawé sangsara
lega simalu sengsara siduri
kutang ilara kutang
narkoba ngaé hidup tan paguna
lan suud matimpal narkoba
narkoba timpal palsu

4. ULIAN PUNYAH
Tanah linggah suba telah
Gumi telah ba sing gelah
Basang layah pis telah
Anggehan kondén mabayah
Gaé sing ngelah
Kanggoang dadi pangayah
Gumi ba wayah
Jaman ba tawah
Ah…jeg pragat punyah
Punyah ngadep tanah
Punyah ngaé benyah
Lan pada malajah
Liu ada galah
Ngalih selah
Apang melah
Bali pang sing telah
Lan suud mamunyah.

5.
sugih nadak

Sugih-sugih tiang sugih
Tiang sugih
Liu ngelah pipis
Pang ade anggo ngisinin lega
Anaké sugih ento liu pesan.
Ada ané sugih linggah ngelah tanah
Ada ané sugih liu ngelah umah
Ada masih sugih ané care tiang
Sugih –sugih tiang sugih
Tiang sugih ngadep warisan

6.
reklamasi

ampurayang titiang puniki
niki tutur puyung tan paisi
bareng nyatua reklamasi
kocap ngurug pasih di pasisi
ngaé tongos malali
pang liu torisé kabali
mirib suba med nolih tradisi
mawinan perlu réklamasi
bin pidan yéh maluab kasisi
dini ditu abrasi
nyaru-nyaru kasa-kisi
mapinunas kema mai

kadén kuangan caru
mulang pakelem  dini ditu
bébék siap payu matunu
segehan bilang bucu
buta kalané ngrebeda
ida bhatara mirib duka
tusing ja marasa
buta kala tuah iraga
ngaé bancana tuah imanusa
(ampun terbit)

7.
gumi wayah

rem-rem selem
gurindam gurindem
ngemu gulem
masemu gelem
kliab-klieb guminé

karasa katangkeb langit
peteng dedet
klebat-klebét
endihan tatit

grudug yéh ngebyor
grudug angin ngalinus
grudug linuh magejeran
grudug gunung makeplug

tusing je ulian kuangan banten
boya je karana kuang pakelem
sing masi ulian widi duka
suba aab gumi
ngiring ngastiti
ring Hyang Widhi
dumadak baktiné kaaksi
mangda sutrepti
sami manggih santhi
ngiring Hyang Widhi
om shanti shanti shanti

8. Urip

Maurip dados manusa
Sangkan pican Hyang widi Wasa
Pradé panemaya prapti
Rikala urip surut nilarin raga
Urip matilar saking buani
Ngungsi jagat niskala
Tan prasida kakelidin
Tan prasida katunas
Sugih lacur jegég bagus
Sami mamargi lampus
Wantah karma nyarengin
Ring wates idup kalawan mati
Mangde sida eling Hyang Kawi

9. Bakti

Napi malih aturang
Sami Hyng Widi nuwenang
Buah lan bunga sané katonang
Sami duenang Hyang Embang

Bungan manah sané becik
Sané mekar ring kayun
Mabuah karma luung.
Punika cihna bakti ring Widi
Madasar kayun ening
Sakadi suaran genta makelening
Tek ning tek ning
Sane butek dadi ening

10. indik unduk

liu nawang indik
kewala sing maunduk
wireh gangsaran tindak
care kuping ngaliwatin tanduk
keneh gedé bayu enduk
keme mai tundak tundik

sulur idep
sulur idup
apang melah
apang elah
nuluh lampah urip
salantang tuwuh
apang landuh

11. tutur ibapa
Jani bapa nuturin cening
Apang pada tatas uning
Yadiastun lekad mabekel eling
Entasin lampah hidupé cening
Madasar keneh hening
Aget lacur adung masanding
Jani kedék mani bise ngeling
Sebeté saruang  magending

Bagia ade tuah dikeneh
Melah-melah ngabe pepineh
Ken pelih ken beneh
Dasarin ban Keneh.
Keneh ané beneh
Beneh ban mepineh.
Pang sing nyakit keneh

De sanget ngugu tutur disisi
Care jani perlu masi koreksi
Saru puyung teken misi
De jeg nyalanang emosi
Pang tusing nyesel siduri
Ne tutur bapene gisi
Anggon bekel ngeliwatin wai
Ane luung duduk gisi
Ané jelék entungan kasisi

12. telas alon alon

Tanah carik mentik beton.
Tukad pasih masih kaon,
Sami telas alon alon.
Ide dané para sameton.
Sampunang bes kedropon.
Yen pipis manten anggén tetujon,
Sami pacang kaon,

13.
yadnya utama

tanah pasih
entik-entikan
saisin Gumi
sami pakardin Widhi
sami wantah duwén widhi
napi malih aturang
yen rasayang tiang
yadnya pinih utama
wantah parisolah sané becik
pikayun sané luwih
turmaning welas asih
pastika rahayu kapanggih

14. alas puun

enu karasa marawat gadang
entikan kayu wiadin padang
enu karasa tis desiran angine
nyapuin kulité
sane mangkin sampun puun
telas dados aon
sami telas alon alon
pamuput pacang kaon
angine kaganti andus
kebus makudus
akeh jatma mati matambus
mamargi lampus
alas nges sampun hangus

15. masawitra

solah laksanané apang melah,
manyama braya apang élah
anggon bekel saenu dilemah
masawitra apang asih,
saling asah saling asuh,
sing dadi saling pisuh
matimpal saling tulung
ditu lakar nemu luung.
sawitra satmaka kasugihan

16.
segara nyuhjuh giri

segara ring pasisi
genah malasti
segara lan giri
pinaka lingga yoni
genah sané suci
sané mangkin segara ring pasisi
anyud plaibang abrasi
toye maluab kapesisi
mamargi nyuhjuh giri
segara giri ring bali
mangda ajeg sutrepti

17. abrasi

yéh maluab kasisi
dini ditu telah abrasi
tanah carik dipasisi
sertipikatné tekek kagisi
kewala tanahné anyudang abrasi
kénkénang jani bali
sing pragat tuah dimunyi
raos puyung tan paisi

segara dipasisi
tongos melasti
ané jani
segara nyuhjuh giri
bali uber abrasi

18. kasa kisi

yening dadi pejabat tinggi
diduwur negak dikursi
gajih abulan genep beliang nasi
basang kembung liunan misi
nu masi kasa kisi
tolah tolih nyaru-nyaru kesisi
kasa kisi laut korupsi

care iraga dadi buruh
mamodal mesuang peluh
beneng kangin beneng kauh
kasa kisi aruh-aruh
pejabat tekén buruh
hidupe masih patuh
pade pade mengeluh
tusing ade gaé aluh
makejang merasa tuyuh
tuh ngetuh peluh kanti tuh

19.
siwaratri

peteng pitu catur dasi
mangaran siwaratri
batara siwa malaksana yoga murti
siwa siwa siwa maha déwa
saksiang ja jagran titiang batara siwa.
mangda lebur dosan titiang batara siwa.
pajati bilwa lan padma maka siwaratri sarana.
upawasa lan jagra brata maka siwaratri sadana
siwa siwa om nama siwaya

20.
kembung puyung

mapi ririh dot kajungjung
kasumbung
tegeh nambung
sujatine puyung
ngatikbangbung
kembung puyung
malalung
ulian tegeh nambung
payu ulung baonge elung
tulung-tulung
tiang ulung
kapangkung puyung
--------
nyiramang

tepi layonupacara wus puput
akwueh para tamiu pasaliwer pada matulung
sangkaning panumayan
urip embas matilar nyuhjuh jagat niskala
sang atma mabur ring ambara
wau lepas ring sarira
pratisentana angajap ajap
tungtung tangis marasa kalaran manah enyag tan sinipi
uduh sang maraga atma
mogi riwekas malih katemu majadma ring marcapada
gelis mamargi becik
suarga buana gelis kapangguh

singaraja/30/12/15

kanggoang malu

kanggoang malu melalung
pules matikeh karung
nyen nawang bin pidan nasib luung. kayang jerijin bais mabungkung sinah ditu kasengguh wong agung
ulian kantonge sng taen puyung

26 Desember 2015 pukul 16:24

kelet
nyuksuk nyeleksek
kanti maseksek
ulian sng nawak lek
ngisinin ambek
dadi berek
dot bungah
ulian jengah
ngadep tanah

19 Desember 2015 pukul 11:34·

pawisik
Sad ripu kagugu
Peteng pitu katiru
pitutur guru sing kagugu
ngalih sipta dini ditu
tongos tenget ne katuju
ngalih pawisik guyu

kaden betare ngicen pawisik
taune tonye kisik kisik
maan paica batu akik
mejalan mulih ngerimik
ked jumah mereresik
kapenikaan ngae palinggih   cenik prajani dadi balian pawisik
22 November 2015 pukul 13:32

ampas tebu

nguda beli jani ngalahin tiang disubane bli taen ngerasayang
bli tan bina care ikumbang.
ane den ngisep ikembang
telah manisne tiang kakutang
dugas nu pade sayang
bli mejanji tresna sakayang kayang. ngae keneh tiang melayang.
misi ngorahang tresna kanti dadi yang kompyang.
melinggih bareng dadi dewa hyang.
12 Oktober 2015 pukul 18:34

ring pura dalem puri
mangkin ngaturang bakti
malarapan canang sari
masesari manah suci
masekar kayun suci
mogi baktine keaksi
sami manggih shanti

pura dalem puri besakih18/9/2015

ukang keruk
sing kanggo sendok anggon nyinduk.
pang liunan pego anggo ngeruk.
wireh pidan telah kantongen maseluk.
pang balik modale matumpuk
lebihan indik kale sng maunduk.
gowa lawah..18.9.2015

jalan hidup
iraga lekad mabekel eling
nyalani lampah hidup
suka duka adung masanding pejalanne maurip bisa beneng bisa bengkok
prade panamaye prapti
urip matilar ninggalin raga
ngungsi jagat niskala
wantah mabekel karma

sAng surya sampun makaon
ngaseng kauh sada alon
ring wates tengai kalawan wengi ditangggun sandikalane.
ngungsi manah tunggalang idep
ring hyang embang.
malarapan puja bakti.
dumogi kA aksi
17 Agustus 2015 pukul 18:01·

kuningan.
sakadi suaran genta makelening
tek ning tek ning tek ning
sane butek mangde ning
malarapan kayun sane hening masarana janur kuning
rahinan kuningan sarwa kuning
sane kaapti mangda nirmala ning asampunike mangda uning
ning ning ning
pangangge kuning
keneh ning.
rahajeng sami ening.
ning mapuara eling.
karangasem...25/7/15.hari raya kuningan
--
yening sujati.
buke raos beli
ngorahang tresna hidup semati
jalan jani dini iraga ngiket janji ngadungan tresna ane suci apang tusing tyang nyakit hati
disubane bli mekirig megedi
16 Juli 2015 pukul 23:43·

Nyakupang tangan nyumbah hulun. Nyikiang manah nyikiang kayun kasungsung lan kasuun.
ngaturang bakti mesekar jepun. gumNti nunggal ring kayun
sabde bayu idep kadundun kejangkepang ketemuang menek tuun
ngentasin angkihan ipun
puput sampun .
manunggil ring kayun
6 Juli 2015 pukul 22:39

sing dang mecelep uli malu
uli duri masih payu
yen dimalu mekancing pintu
jendelane dadi laku
nginep lemah sing bani pesu.
beten longan nengklep dibucu.
keto trunane jaman malu
mengkeb mengkeban pang payu.
ulian rerame sing setuju
.29 Juni 2015 pukul 13:04·

diapin bli kapah jumah
sesai ngalahin umah
tusing ulian memunyah
setate inget teken somah
mekuli peteng lemah
pang hutang payu mebayah
29 Juni 2015 pukul 8:50·
.....
diduur bukit.
dibeten langit.
disAnjene pingit
bon awak sube pengit
mekejang genit
kenehe lengit.
bise tuah kejengat kejengit
....
ngAstiti ring Widhi.
ngaturang bakti.
melarapan mantram gayatri
lan canang sari
dyastun sing misi sesari
ane penting manah suci
pasti baktine keaksi
mogi sareng sami.
manggih santi
6 Juni 2015 pukul 7:45·

....
saling sikut
saling gut gut
puput payu uyut.
merase paling patut
bon entut.
kaden mobo jukut.
9 Juni 2015 pukul 11:31
...
gumine wayah.
ape jamane tawah.
pade ngendah.
pade bah
pegat ked diakah
berag nandang layah.
engsap ken natah
12 Juni 2015 pukul 19:35·
...
srayang sruyung
ulian kantong puyung
bengang bengong bingung
luntang lantungk
lingkang klingkung
ngatibangbung
5 Juni 2015 pukul 7:14·
...
lampah hidup tyange niki
nyikut rurung bilang wai
ngepungin lawat pedidi
dot mekeber skadi kedis sesapi
suke duke lare pati
rurung pade empet
kangin kauh kerase bet
dyastun tengai tepet
kerase peteng dedet
...